Monday, 28 November 2011

ژیاننامه‌ی ئه‌و خانمه‌ دۆست و دڵسۆزه‌ی كه‌ به‌ "دایكی كوردان" ناسرابوو


دوێنێ سێشەممە، دۆستی دێرینی گەلی كورد و خێزانی سەرۆكی پێشووتری فەڕەنسا خاتوو (دانیال میتران) كە هاوكات سەرۆكی ڕێكخراوی "ئازادی-فەڕەنسی"ـە، بە هۆی كێشەی كۆئەندامی هەناسەوە لە تەمەنی 87 ساڵیدا لە نەخۆشخانەی "جیۆرجیس پۆمپیدۆ"ـدا، كۆچی دوایی كرد.


"خەمخۆری مافی كورد و دۆستی نەتەوەی كورد" ناوەڕۆكی زۆرینەی ئەو بابەتانەی مێدیاكانی دەرەوەن كە هەواڵی كۆچی دوایی (دانیال میتران) ڕووماڵ دەكەن و باس لە كارە مرۆییەكانی ئەو خاتوونە دەكەن. 


لە سەرەتای ساڵی 1981ـەوە و دوای هەڵبژاردنی هاوسەرەكەی بە سەرۆكی فەڕەنسا، (میتران) چالاكییەكانی خۆی بۆ داكۆكیكردن لە مافەكانی مرۆڤ لە جیهاندا تەرخان كرد. لە ساڵی 1986ـدا ڕێكخراوی "ئازادی-فەڕەنسا"ـی دامەزراند، كارێكی سەرەكیی ڕێكخراوەكە بەرگریكردن لە مافی مرۆڤ و مافی نەتەوە كەمینەكان بوو.

(میتران) بە یەكێك لە دۆستە نزیكەكانی كورد و تیبیتییەكان هەژمار دەكرێت، لە كۆتایی ساڵی 1991ـدا لە ڕێگەی ئێرانەوە سەردانی هەرێمی كوردستانی كرد و لەگەڵ بەرپرسانی هەرێمدا كۆ بوویەوە و لە ساڵی 1989ـیدا زیاتر لە 200 خێزانی ئاوارەی كەمپەكانی توركیای بەرەو فەڕەنسا بردن و ژیانێكی شاییستەی بۆ دابین كردن. 

ئەو لە ناخۆشترین ڕۆژگاری كورد و لە كاتی كیمیابارانكردن و ئاوارەیی ئەو نەتەوەیەدا، هاندەرێكی گەورەی جیهان بووە بۆ یارمەتیدانی كورد و ڕزگاركردنی لە نەهامەتییەكان هەر لەبەر ئەوەیش بە "دایكی كورد" ناسراوە. هەروەها لە كاتی كۆڕەی 1991ـدا، بە پێشنیازی فەڕەنسا بڕیاری ژمارە 688 دەرچوو كە پاراستنی كوردی لێ كەوتەوە و "نەوای ئارام" لە هێڵی 36ـی باشووری كوردستاندا دامەزرا.

(دانیال میتران) لە دواسەردانیدا بۆ هەرێمی كوردستان و لە 16ـی ئەیلوولی ساڵی 2009ـدا بە بۆنەی هەڵبژاردنی خولی سێیەمی پەرلەمانی كوردستانەوە، گوتارێكی لە نێو پەرلەماندا پێشكەش كرد و گوتی: "كاتێك لە كۆتایی نیسانی 1991 لە ڕێگەی كوردستانی ئێرانەوە هاتم بۆ بینینتان، خەڵكم لە سەر ڕێگەكان دەبینی كە لە ترسی ئازار و مەینەتییەكان و سوپای (سەددام حوسێن)، كۆچیان دەكرد و هەڵدەهاتن، وێنەكانی ئەو كۆچڕەوە زۆر شپرزەی كردم، هەروەك وێنەی خەڵكانی پاشماوەكانی ئەنفال و چەكی كیمیایی كە ئایاری 1989 لە كەمپەكانی مێردین و دیاربەكر و مووش لە كوردستانی توركیا، بەرچاوم كەوتبوون."

گوتیشی: "لە ماوەی ئەو 30 ساڵەدا‌ كە دۆستایەتیی كوردم کردووە، فێری خۆشەویستیی خەڵكی ئێوە بووم و‌ ئێستایش خۆم بە یەكێك لە ئێوە دەزانم. كیشەكەتان كێشەیەكی ڕەوایە و دابونەریتە جوانەكانتان مایەی شانازین، بۆیە بڕوام وایە ئەو ڕۆژەی كوردەكان لە نێو خۆیاندا لە یەكتر دەگەن، هەموو دونیا لە گەڵیان باش دەبێت و هاوسۆزیی لەگەڵ‌ ڕزگاربوونیان دەكات. زۆر جار بە من دەڵێن دایكی كورد، دایك هەمیشە دەیەوێت منداڵەكانی لە یەكتر تێ بگەن و لەناو خۆیاندا هاوكار و تەبا بن."

پاشخان
* لە 29ـی تشرینی یەكەمی ساڵی 1924ـدا لە شاری "ڤێردون"ـی خۆرهەڵاتی فەڕەنسادا لە دایك بووە.

* لە جەنگی دووەمی جیهانی و لە ساڵی 1940 دوای داگیركردنی فەڕەنسا لە لایەن ئەڵمانیاوە، لە تەمەنی 17 ساڵییەوە پێوەندیی بە ئۆپۆزیسیۆنی فەڕەنساوە كردووە.

* لە 28ـی تشرینی یەكەمی ساڵی 1944ـدا ژیانی هاوسەری لەگەڵ سەرۆكی پێشووتری فەڕەنسا (فرانسیۆس میتران) پێك هێناوە.
* لە ساڵی 1981 وازی لە كاری سیاسی هێناوە و كاری بۆ مافی مرۆڤ كردووە.

* لە ساڵی 1986ـدا ڕێكخراوی "ئازادیی-فەڕەنسا"ـی پێك هێناوە كە كاری داكۆكیكردن بووە لە مافی مرۆڤ.

* لە ساڵی 1989 یەكەمین كۆنفڕانسی بۆ كورد لە پاریس ڕێك خستووە.

*لە ساڵی 1991ـیشدا دەنگی كوردی گەیاندە ئەندامانی كۆنگرێسی ئەمەریكا.


   

No comments:

Post a Comment